ರಂಗಿತರಂಗದ ಯಶೋಗಾಥೆ ಇನ್ನೂ ಮುಗಿದಿಲ್ಲ. ಅಮೆರಿಕಾ ದೇಶ ಮಾತ್ರವಲ್ಲದೆ, ಯೂರೋಪ್‌ನಲ್ಲೂ ಜಯಭೇರಿ ಬಾರಿಸಿದೆ . ಯುಎಸ್‌ಎ ಒಂದರಲ್ಲೇ ಇದರ ಗಳಿಕೆ 3 ಕೋಟಿ ಅನ್ನುವುದು ಅಚ್ಚರಿ. 50 ದಿನಗಳನ್ನು ಪೂರೈಸಿರುವ ಮೊದಲ ಕನ್ನಡ ಚಿತ್ರ ಇದು. ಈಗಲೂ ಪ್ರದರ್ಶನ ಮುಂದುವರಿಸಿದೆ. ಇಷ್ಟೇ ಅಲ್ಲ, ಜಗತ್ತಿನಲ್ಲಿ ಹೆಚ್ಚಿನ ದೇಶಗಳಲ್ಲಿ ಪ್ರದರ್ಶನಗೊಂಡ ಮೊದಲ ಭಾರತೀಯ ಚಿತ್ರ ಎಂಬ ಹೆಗ್ಗಳಿಕೆ ಇದರದ್ದು.
ಅಮೆರಿಕಾದಲ್ಲಿ 72ಕ್ಕೂ ಹೆಚ್ಚು ಕಡೆ ಚಿತ್ರ ಪ್ರದರ್ಶನಗೊಂಡಿದೆ. ಸ್ಯಾನ್ ಜೋಸ್, ಕ್ಯಾಲಿಫೋರ್ನಿಯಾ, ಎಡಿಸನ್ ಮತ್ತು ನ್ಯೂಜೆರ್ಸಿಗಳಲ್ಲಿ ಹೌಸ್‌ಫುಲ್ ಪ್ರದರ್ಶನ ಕಂಡಿದೆ. ನ್ಯೂಯಾರ್ಕ್ ಟೈಮ್ಸ್ ಬಾಕ್ಸ್ ಆಫೀಸ್ ಲಿಸ್ಟ್‌ಗೆ ಸೇರಿದೆ ರಂಗಿತರಂಗ. ಈ ಪಟ್ಟಿಯಲ್ಲಿ ಹಾಲಿವುಡ್ ಚಿತ್ರಗಳೂ ಸೇರಿದ್ದು, ಟಾಪ್ 27 ಚಿತ್ರಗಳಲ್ಲಿ ಕನ್ನಡ ಚಿತ್ರ ಒಂದೆನಿಸಿಕೊಂಡಿತು. ಮಲ್ಟಿಪ್ಲೆಕ್ಸ್‌ನಲ್ಲಿ ಬಿಗ್ ಹಿಟ್ ಆಗಿ ಇದುವರೆಗಿನ ಎಲ್ಲಾ ಕನ್ನಡ ಚಿತ್ರಗಳ ದಾಖಲೆಯನ್ನು ಮುರಿದಿದೆ.
ಯೂರೋಪ್‌ನಲ್ಲಿ ಎರಡನೇ ಬಾರಿ ಚಿತ್ರ ಬಿಡುಗಡೆ ಮಾಡುವಂತೆ ಡಿಮ್ಯಾಂಡ್ ಶುರುವಾಗಿದೆ. ಲಂಡನ್‌ನಲ್ಲಿ 1300 ಸೀಟುಗಳ ಚಿತ್ರಮಂದಿರಗಳು ಮೊದಲ ಬಾರಿ ಹೌಸ್‌ಫುಲ್ ಆಗಿದ್ದು ರಂಗಿತರಂಗ ಚಿತ್ರದಿಂದ.
ಇದುವರೆಗೆ ಕನ್ನಡ ಚಿತ್ರ ಪ್ರದರ್ಶನಗೊಂಡಿರದ ದೇಶಗಳಿಗೆಲ್ಲಾ ರಂಗಿತರಂಗ ಹೋಗಿರೋದು ವಿಶೇಷ. ಹಾಲೆಂಡ್, ಬರ್ಲೆಂಡ್, ಜರ್ಮನಿ, ನೆದರ್‌ಲೆಂಡ್ ಹೀಗೆ ಹಲವು ದೇಶಗಳಲ್ಲಿ ಈಗಾಗಲೇ ಚಿತ್ರ ಪ್ರದರ್ಶನಗೊಂಡು ಮೆಚ್ಚುಗೆ ಗಳಿಸಿದೆ. ಸ್ವೀಡನ್, ಜ್ಯೂರಿಚ್, ಹಾಂಗ್‌ಕಾಂಗ್, ಮಲೇಷಿಯಾ ಮತ್ತಿತರ ದೇಶಗಳಲ್ಲಿ ಪ್ರದರ್ಶನ ಕಾಣಲಿದೆ. ಸದ್ಯದಲ್ಲೇ ಅಬುದಾಬಿ ಮತ್ತು ದುಬೈಗಳೂ ಸೇರಿದಂತೆ ಮಿಡ್ಲ್ ಈಸ್ಟ್‌ನಲ್ಲಿ ಪ್ರದರ್ಶನಗೊಳ್ಳಲಿದೆ.
ಇಷ್ಟಾಗಿಯೂ ವಿದೇಶಗಳಲ್ಲಿ ಇನ್ನು ಕನ್ನಡ ಚಿತ್ರಗಳಿಗೆ ಮಾರುಕಟ್ಟೆ ಕುದುರಿದೆಯಾ ಎಂದರೆ ಇಲ್ಲ ಎನ್ನತ್ತಾರೆ ಅನೂಪ್ ಭಂಡಾರಿ. ಕಾರಣ ಮಾರುಕಟ್ಟೆ, ಮತ್ತು ಚಿತ್ರದ ಕತೆ ಮುಖ್ಯ ಎನ್ನುವುದು. 'ರಂಗಿತರಂಗ ಹಲವು ಕಾರಣಗಳಿಗೆ ವಿದೇಶಿಯರಿಗೆ ಇಷ್ಟವಾಗಿದೆ. ಅಲ್ಲದೆ, ಪ್ರಚಾರ ಕೂಡಾ ತುಂಬಾ ಮುಖ್ಯ. ರಂಗಿತರಂಗದ ನಂತರ ಬಂದ ಕನ್ನಡ ಚಿತ್ರಗಳು ಅಷ್ಟು ಸುದ್ದಿ ಮಾಡಲಿಲ್ಲ. ನಾನು ಅಮೆರಿಕಾದಲ್ಲೇ ಇದ್ದಾಗಲೂ ಬಂದ ಬೇರೆ ಕನ್ನಡ ಚಿತ್ರಗಳ ಬಗ್ಗೆ ನನಗೇ ಗೊತ್ತಾಗಿರಲಿಲ್ಲ' ಎನ್ನುತ್ತಾರೆ ಅನೂಪ್. ರಂಗಿತರಂಗ ಚಿತ್ರದ ನಂತರ, ಐರಾವತ, ಆಟಗಾರ ಮತ್ತಿತರ ಕೆಲ ಕನ್ನಡ ಚಿತ್ರಗಳು ಅಮೆರಿಕಾದಲ್ಲಿ ತೆರೆಕಂಡರೂ ಅಷ್ಟು ಸುದ್ದಿಯಾಗಲಿಲ್ಲ.
- ಪದ್ಮಾ ಶಿವಮೊಗ್ಗ