ಹಲವು ಕಾರಣಗಳಿಂದಾಗಿ ಊಜಾ ಸಿನಿಮಾ ಕುತೂಹಲ ಮೂಡಿಸಿದೆ. ಈ ಚಿತ್ರಕ್ಕೆ ಮೂವರು ನಾಯಕಿಯರು. ಅವರಲ್ಲಿ ಗಾಯಿತ್ರಿ ವೆಂಕಟಗಿರಿ ಕೂಡ ಒಬ್ಬರು. ಉಳಿದಿಬ್ಬರು ನಾಯಕಿಯರು ಕೇವಲ ಒಂದೊಂದು ಪಾತ್ರ ನಿರ್ವಹಿಸಿದ್ದರೆ, ಗಾಯಿತ್ರಿ ಎರಡು ರೀತಿಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ನಾಯಕಿಯ ಜತೆಗೆ ನಿರ್ದೇಶಕಿಯಾಗಿ ನಟಿಸಿದ್ದಾರೆ. ಈ ಸಿನಿಮಾದಲ್ಲೊಂದು ಸಿನಿಮಾ ನಡೆಯುತ್ತದೆ. ಸಿನಿಮಾದಲ್ಲಿ ನಾಯಕಿಯಾದರೆ, ಸಿನಿಮಾದೊಳಗಿನ ಸಿನಿಮಾದಲ್ಲಿ ನಿರ್ದೇಶಕಿ. ಹೀಗಾಗಿ ಗಾಯಿತ್ರಿ ನಿರ್ವಹಿಸಿದ ಪಾತ್ರಕ್ಕೆ ಸಾಕಷ್ಟು ಪ್ರಾಮುಖ್ಯತೆ ನೀಡಲಾಗಿದೆ.
'ಇದೇ ಮೊದಲ ಬಾರಿಗೆ ಇಂಥದ್ದೊಂದು ಪಾತ್ರ ನಿರ್ವಹಿಸಿದ್ದೇನೆ. ಎರಡು ರೀತಿಯ ಪಾತ್ರವನ್ನು ನಿರ್ವಹಿಸುವಾಗ ನಿಜಕ್ಕೂ ಕನ್‌ಫ್ಯೂಸ್ ಆಯಿತು. ನಾಯಕಿಯಾಗಿ ಸಲೀಸಾಗಿ ನಟಿಸಿಬಿಡಬಹುದು. ಆದರೆ, ನಿರ್ದೇಶಕಿಯಾಗಿ ನಟಿಸುವುದು ಕಷ್ಟ. ಊಜಾ ಚಿತ್ರದ ನಿರ್ದೇಶಕ ರಾಜಕುಮಾರ್ ರೆಡ್ಡಿಯವರು ಇಂಥ ಟೈಮ್‌ನಲ್ಲಿ ಸಾಕಷ್ಟು ಸಹಾಯ ಮಾಡಿದರು. ಅವರ ಮಾರ್ಗದರ್ಶನದಲ್ಲಿ ಆ ಪಾತ್ರ ಮಾಡಿದೆ' ಅಂತಾರೆ ಗಾಯಿತ್ರಿ.
ಊಜಾ ಅನ್ನುವುದು ಒಂದು ರೀತಿಯ ಆಟ. ಈ ಆಟವನ್ನೇ ಚಿತ್ರಕತೆಯಲ್ಲಿ ಬಳಸಿಕೊಂಡು ಸಿನಿಮಾ ಮಾಡಿದ್ದಾರೆ ನಿರ್ದೇಶಕರು. ಕುತೂಹಲದ ಸಂಗತಿ ಅಂದರೆ, ಈ ಆಟವನ್ನು ಹಲವು ಬಾರಿ ಗಾಯಿತ್ರಿ ಆಡಿದ್ದಾರಂತೆ. 'ಮೂರು ಜನ ಇದ್ದರೆ ಮಾತ್ರ ಈಆಟವನ್ನು ಆಡುವುದಕ್ಕೆ ಸಾಧ್ಯ. ಹೊಸಬರು ಆಡುವಾಗ ಭಯ ಆಗುತ್ತದೆ. ಆದರೆ, ನಾನಂತೂ ಯಾವತ್ತೂ ಹೆದರಿಲ್ಲ. ಥ್ರಿಲ್ ಅನುಭವಿಸಿದ್ದೇನೆ' ಅನ್ನುವುದು ಗಾಯಿತ್ರಿ ಮಾತು.
ಊಜಾ ಸಿನಿಮಾದಲ್ಲಿ ಮಾತ್ರವಲ್ಲ, ದರ್ಶನ್ ನಟನೆಯ ಜಗ್ಗುದಾದ ಚಿತ್ರದಲ್ಲೂ ಇವರು ನಟಿಸುತ್ತಿದ್ದಾರೆ. ಅಲ್ಲದೇ ವಿನೋದ್ ಪ್ರಭಾಕರ್ ನಟನೆಯ ಟೈಸನ್ ಚಿತ್ರಕ್ಕೂ ಇವರೇ ನಾಯಕಿ. ಊಜಾದಲ್ಲಿ ಗ್ಲಾಮ್ ರೀತಿಯ ಪಾತ್ರ ಮಾಡಿದ್ದರೆ, ಟೈಸನ್‌ನಲ್ಲಿ ಸಿಂಪಲ್ ಹುಡುಗಿ. ಜತೆಗೆ ಕೊಂಚ ಬೋಲ್ಡ್ ಪಾತ್ರ. ಜಗ್ಗುದಾದ ಚಿತ್ರದಲ್ಲಿ ನಮೋ ಭೂತಾತ್ಮ ರೀತಿಯ ಪಾತ್ರವನ್ನೇ ಮಾಡಿದ್ದಾರೆ.
ಇವರು ಮೂಲತಃ ಕೇರಳದವರಾದರೂ, ಚೆನ್ನಾಗಿಯೇ ಕನ್ನಡ ಮಾತಾಡುತ್ತಾರೆ. ಸ್ಕೂಲ್‌ಗೆ ಹೋಗದೇ ಕನ್ನಡ ಕಲಿತದ್ದು ವಿಶೇಷ. 'ನಾನು ನಾಲ್ಕನೇ ಕ್ಲಾಸ್ ಓದಿದ್ದು ಮೈಸೂರಿನಲ್ಲಿ. ಆನಂತರ ಕರ್ನಾಟಕದಲ್ಲೇ ಇರಲಿಲ್ಲ. ನಮೋ ಭೂತಾತ್ಮ ಸಿನಿಮಾದಲ್ಲಿ ನಟಿಸುವಾಗ, ನನಗೆ ಕನ್ನಡ ಬರುತ್ತಿರಲಿಲ್ಲ. ಆದರೆ, ಕನ್ನಡ ಕಲಿಯುವ ಹಠ ಬಂತು. ಸೆಟ್‌ನಲ್ಲಿ ಕೆಲಸ ಮಾಡುತ್ತಿದ್ದ ಹುಡುಗರ ಜತೆ ಅಷ್ಟಿಷ್ಟು ಕನ್ನಡದ ಪದಗಳನ್ನು ಮಾತಾಡುತ್ತಿದ್ದೆ. ತಪ್ಪಾಗಿದ್ದರೆ ಅವರೇ ತಿದ್ದೋರು. ಹೀಗೆ ಕನ್ನಡ ಕಲಿತೆ. ಮೂರು ಸಿನಿಮಾದಲ್ಲಿ ನಟಿಸುವುದರೊಳಗೆ ಬೇರೆಯವರ ಮಾತನ್ನು ಅರ್ಥ ಮಾಡಿಕೊಂಡು, ರಿಯ್ಯಾಕ್ಟ್ ಮಾಡುವಷ್ಟು ಕನ್ನಡ ಬರುತ್ತಿದೆ' ಅಂತಾರೆ ಗಾಯಿತ್ರಿ.
ಇವರ ನಟನೆಯ ಊಜಾ ಸಿನಿಮಾ ಇದೇ ಶುಕ್ರವಾರ ಬಿಡುಗಡೆ ಆಗುತ್ತಿದೆ. ಕನ್ನಡದಲ್ಲಿ ಬಿಡುಗಡೆ ಆಗುತ್ತಿರುವ ಇವರ ಎರಡನೇ ಸಿನಿಮಾ ಇದು. ಈ ಚಿತ್ರದಲ್ಲಿ ತಮಗೊಂದು ಬ್ರೇಕ್ ಸಿಗುವ ನಿರೀಕ್ಷೆ ಗಾಯಿತ್ರಿಯವರದ್ದು.
- ಶರಣು ಹುಲ್ಲೂರು